स्पेनको एक टापुमा ५० वर्षपछि ज्वालामुखी विस्फोट
काठमाडौं । स्पेनको एक टापुमा ज्वालामुखी विस्फोट भएको छ ।
८५ हजार जनसंख्या रहेको स्पेनको ला पाल्मा टापुमा रहेको क्याम्ब्रे भिएजामा ज्वालामुखी विस्फोट भएको अन्तराष्ट्रिय सञ्चारमाध्यमहरुले जनाएका छन् ।
ज्वालामूखी विष्फोटनपछि त्यहाँ ११ सय डिग्री सेल्सियस तापक्रमको उम्लिरहेको लाभा सयौं फिट माथिसम्म उडिरहेको देखिएको छ । आकाशमा धुवाँ र खरानी देखिएको छ ।
ज्वालामूखी विष्फोटनका कारण सय भन्दा बढी घरहरु भत्किएका छन् । त्यस्तै, ५ सय विदेशी पर्यटक सहित ५ हजार मानिसहरुलाई सुरक्षित स्थानहरुमा सारिएको छ ।
मानिसहरुलाई उद्धार गर्न सेना परिचालन गरिएको छ । लाभा आवासीय क्षेत्रहरु तर्फ पनि तीव्र गतिमा बढिरहेको स्पेनी सेनाले जनाएको छ ।
स्पेनको नेशनल जियोलोजी इन्स्टिच्युटका प्रमुख इताहिजा डोमिनगुएजका अनुसार यो विष्फोट करिब ५० बर्ष पछि भएको हो ।
ज्वालामुखी विष्फोट हुनु एक साताअघि टापुमा २२ हजार भन्दा बढी भूकम्पको धक्का महसुस भएको थियो । यसअघि सन १९७१ मा ज्वालामुखी विस्फोट भएको थियो ।
प्रतिक्रिया