बझाङः पहिरोमा बेपत्ता भएका १९ जना भेटिने सम्भावना न्यून

बझाङ । बझाङको थलारा गाउँपालिकामा पहिरोमा परी १९ जना बेपत्ता भएका छन् ।

बेपत्ता भएका १९ जना भेटिने सम्भावना न्यून हुँदै गएको छ । बेपत्ताको खोजी गर्न गएको प्रहरी टोली फिर्ता भएको छ ।

आठ दिनसम्म लगातार खोजी गरे पनि शव नभेटिएपछि प्रहरीले खोजी कार्य बन्द गरेको छ ।

यही कात्तिक पहिलो साता थलारा–४ डिक्लामा पहिरोमा परी दुई परिवारका २३ जना बेपत्ता भएका थिए । बेपत्तामध्ये चार जनाको मात्र शव फेला परेको थियो भने दुई जनाको कम्मरभन्दा मुनिको भाग मात्रै भेटिएको थियो।

घटना लगत्तै प्रहरी टोली हेलिकप्टरमा गएर खोजीकार्य अघि बढाएको थियो ।

नेपाली सेना, सशस्त्र प्रहरी र नेपाल प्रहरीको संयुक्त टोलीले प्रयास गरेपनि बेपत्ता व्यक्ति भेटाउन नसकेको प्रहरी नायव उपरीक्षक रुपक खड्काले बताए ।

प्रमुख जिल्ला अधिकारी मोहन अधिकारीले आवश्यक प्रक्रिया पुर्‍याएर बेपत्ता सबैलाई मृत घोषणा गरिदिने बताए ।